Honda

Honda Motor Company, Ltd. atawa sokanan disebut Honda (basa Jepang: 本田技研工業株式会社, tuker hurup: Honda Giken Kōgyō Kabushiki Gaisha; hurup Arab Gundul: هوندا) entu atu matskepé antèrobangsa nyang asalnya deri negeri Nipong nyang ngeja gandaran bakal sapar, seroman ama mubil èn montor. Enni matskepé ada punya sintrem di Tokyo, negeri Nipong.

Honda uda jadi pengeja montor paling gedé èn menjès di dunia sempragan taon 1959. Honda ada hasilnya ngeja 400 tiaw montor ampé buntutan taon 2019, serènta jadi pengeja mesin bakaran dalem jumblah paling gedé sedunia, nyang pengejaannya ngelebihin 14 tiaw mesin bakaran setaonannya. Honda entu pengeja mubil paling gedé kedua di negeri Nipong di taon 2001. Honda ogè jadi pengeja mubil paling gedé nomer lapan di dunia taon 2015.

Honda entu pelopor pengeja mubil deri negeri Nipong nyang ngelangsir asma mubil mantep mèwahnya sendèwèk, nya'entu Acura di taon 1986. Selaèn ngeja mubil èn montor, Honda gè ngeja peranti ngebon, mesin kelaotan, gandaran aèr pribadi, generator lèstrik, èn laènnya. Sempragan taon 1986, Honda udah kinclo' dalem pengajian calakan bikinan atawa robot èn ngelangsir robot ASIMO di taon 2000. Honda gè uda megar ke sèktor penghiberan dengen kawas ngewangun GE Honda Aero Engines di taon 2004 èn mulain ngeja Honda HA-420 HondaJet di taon 2012. Honda ada punya dua joint venture di negeri Tiongkok, nya'entu Dongfeng Honda èn Guangqi Honda.

Di taoh 2013, Honda ngandilin kitaran 5,7% deri pemasupan duinya (US$6,8 miliar) bakal pengajian èn pemegaran. Di taon 2013 gè, Honda udah jadi pengeja penggandaran (otomotif) deri negeri Nipong nyang jadi pengèkspor bersih deri Amrik Serèkat, dengen ngèksporin 108.705 mubil asma Honda èn Acura, tapian cuman ngimpot 88.357 mubil asma Honda èn Acura.